काठमाडौँ– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले वर्तमान सत्तारुढ गठबन्धनलाई आगामी तीनै तहका निर्वाचनसम्म कायम राख्ने प्रस्ताव अघि सारेका छन् । शनिबारदेखि काठमाडौँमा शुरु भएको केन्द्रीय कमिटी बैठकमा अध्यक्ष प्रचण्डले पेश गरेको राजनीतिक तथा सांगठनिक प्रतिवेदनमा आगामी निर्वाचनसम्म वर्तमान सत्तारुढ गठबन्धनलाई कायम राख्ने प्रस्ताव राखेका हुन् ।

केपी शर्मा ओलीविरुद्धको गठबन्धन लोकतान्त्रिक प्रणाली, संविधान र स्थायित्व तथा सुशासनका लागि भएकाले आउने चुनावसम्म कायम राख्ने प्रचण्डको प्रतिवेदनमा उल्लेख छ । आफ्नो प्रस्तावमा प्रचण्डले आगामी स्थानीय, प्रदेश र संघीय निर्वाचनमा माओवादीलाई नेतृत्वदायी शक्तिका रुपमा स्थापित गर्ने समेत योजना अघि सारेका छन् ।

उनले ओलीबाहेकका कम्युनिस्टहरुको एकीकरण गर्ने समेत बताएका छन् । प्रचण्डले आगामी पुस ११ देखि राष्ट्रिय सम्मेलन गर्न प्रस्ताव गरेका छन् । पुस ११, १२ र १३ गते राष्ट्रिय सम्मेलन गर्न प्रचण्डको प्रस्ताव छ । भदौ मसान्तभित्र पार्टी सदस्यता नवीकरण तथा वितरण गर्ने, असोज १० गते सेल र टोल भेला गर्ने, २० गते वडा सम्मेलन, ३० गते स्थानीय तहमा सम्मेलन र कात्तिक ३० मा जिल्ला सम्मेलन गर्ने प्रचण्डको प्रस्ताव छ ।

आजकै बैठकमा प्रचण्डले विधान संशोधनको प्रस्ताव पनि पेस गरेका छन् । प्रचण्डले दुई वटा प्रस्ताव गरेपछि त्यसमाथिको छलफलका लागि ८ वटा समूह बनाइएको छ । समूहमा भएको छलफल बैठकमा पेस हुने प्रवक्ता नारायणकाजी श्रेष्ठले जानकारी दिए । आठ वटै समूहलाई भोलि बिहान ११ बजेसम्मका लागि छलफलको समय दिइएको छ ।