काठमाडौँ, सर्लक्क पछाडि लगेको कपाल, ठूलो निधार, आँखामा चस्मा, तिलचामले जुङ्गा, झट्ट हेर्दा प्रचण्ड जस्तै देखिने  कर्णाली प्रदेश इन्चार्ज काली बहादुर मल्ल माओबादी केन्द्रको स्थायी समिति सदस्य मनोनित भएका छन । २०४७ सालदेखि प्रचण्डसँगै एउटै पार्टीमा राजनीति गरिरहेका मल्ल यतिबेला माओबादी केन्द्रको स्थायी समितिमा परेका हुन ।

माओबादी केन्द्रको काठमाडौँ कमलादीमा बसेको केन्द्रीय समितिको बेठकले मल्ललाई मनोनित गरेको हो । पार्टी अध्यक्ष पुष्पकमल दाहाल ‘प्रचण्ड’ले मल्ललाई स्थायी समिति सदस्यमा मनोनित गर्ने प्रस्ताव पेश गरेका थिए।

मल्ल हाल कर्णाली प्रदेश इन्चार्ज समेत रहेका छन । जाजरकोटका स्थायीबासी मल्ल युद्धकालका पश्चिम क्षेत्रका चर्चित नेता हुन ।

को हुन् कालीबहादुर मल्ल ?

जाजरकोट क्षेत्र नम्बर एकबाट विजयी संविधान सभा सदस्य कालीबहादुर मल्ल देश र जनताको हितमा निरन्तर लागेका एक राष्ट्प्रेमि नेता हुन् ।

२०१४ साल फागुन २१ गते जाजरकोटको सदरमुकाम खलंगा ४ बोहरामा जन्मीएका मल्ल जाजरकोटका संस्थापक कम्युनिष्ट नेता समेत हुन । सदरमुकाममा जन्मीएका उनको बाल्यकाल सुखद नै बित्यो । २०४६ सालमा बहुदलीय व्यवस्था पुनस्थापना भए पछि संयुक्त जनमोर्चामा आबद्ध मल्ल २०४९ सालको स्थानीय निर्वाचनमा जाजरकोट इलाका नं १ को जिल्ला विकास समितिको सदस्यमा निर्वाचित भएका थिए ।

एकिकृत नेकपा माओवादीले २०५२ सालमा जनयुद्ध थालनी गरेसँगै भूमिगत भएका मल्ल जनयुद्ध कै क्रममा माओवादीले गठन गरेको जिल्ला जनसरकारको जाजरकोट प्रमुख पनि भए । माओबादी आन्दोलनमा पुर्णकालिन भएसंगै मल्ल निरन्तर प्रचण्डसंर्गै रहेका छन ।