काठमाडौं, राष्ट्रिय जनस्वास्थ्य प्रयोगशाला (एनपीएचएल)ले कोरोना भाइरस (कोडिभ १९) परीक्षणपछि रिपोर्टको सूचना दिने काममा गम्भीर लापरवाही गरेको भन्दै शुक्रराज ट्रपिकल तथा सरुवा रोग अस्पतालका चिकित्सकहरुले विरोध जनाएका छन् ।

नेपालमा कोरोना संक्रमण देखिएका तेस्रो व्यक्तिको रिपोर्ट सार्वजनिकमा लापरवाही भएको भन्दै शुक्रराज ट्रपिकल तथा सरुवा रोग अस्पताल टेकुका चिकित्सकहरुले निर्देशकको कार्यकक्ष नै घेराउ गरेका छन् ।खाडी मुलुक संयुक्त अरब इमिरेट्स (युएई)को दुबईबाट नेपाल आएका ३२ वर्षीय एक युवकमा कोरोना भाइरस संक्रमण पोजेटिभ देखिएको भन्दै जनस्वास्थ्य प्रयोगशालाले मंगलबार राति नै रिपोर्ट तयार पारिसकेको थियो । तर, उक्त रिपोर्टबारे बिरामीको जाँचमा संलग्न चिकित्सकलाई जानकारी नदिइएको भन्दै शुक्रराज अस्पतालमा विरोध भएको हो ।

‘कोरोना परीक्षणको रिपोर्ट सर्वप्रथम उपचारमा संलग्न चिकित्सकलाई देखाउनुपर्ने हुन्छ । तर, हामीलाई त यहाँ रिपोर्ट आएको जानकारी समेत दिइएन्,’ शुक्रराज ट्रपिकल तथा सरुवा रोग अस्पतालका एक चिकित्सकले खबरहबसँग भने, ‘लक्षण देखिएका सबै बिरामीमा कोरोना संक्रमण नहुने मान्यताका साथ हामीले काम गरिरहेका छौं । तर, रिपोर्टमा पोजेटिभ देखिएपछि थप सावधानी अपनाउनु पर्छ । त्यसका लागि चिकित्सकले रिपोर्टबारे जतिसक्दो चाँडो जानकारी पाउनुपर्छ ।’

तर, तेस्रो पोजेटिभ केसका रुपमा देखिएको बिरामीको रिपोर्टमा भने ठीक उल्टो काम भएको शुक्रराज अस्पतालका अर्का चिकित्सकको भनाइ छ । ‘बिरामीमा संक्रमण भएको पोजेटिभ रिपोर्ट आएको १२ घण्टापछि मात्रै हामीले समाचार पढेर वास्तविकता थाहा पायौं । यस्तो अवस्थामा कुनै चिकित्सकलाई रोग सरिसक्यो भने त्यसको जिम्मेवार को हुन्छ ? चिकित्सकको सुरक्षाबारे सावधानी अपनाउनु पर्दैन ?’

शुक्रराज अस्पतालका चिकित्सकका अनुसार मंगलबार राति रिपोर्ट आएपछि जनस्वास्थ्य प्रयोगशालाले स्वास्थ्य तथा जनसंख्या मन्त्रालयलाई खबर गरेको थियो । तर, स्वास्थ्य मन्त्रालयले भने बुधबार दिउँसो १२ बजेतिर मात्रै उक्त विषय विज्ञप्ती जारी गरेर सार्वजनिक ग¥यो ।शुक्रराज अस्पतालका चिकित्सकहरुले भने रिपोर्ट आउनेवित्तिकै आफूहरुलाई जानकारी गराइनुपर्ने माग गरेका छन् ।