बिरेन्द्रनगर, नेपालगञ्ज मेडिकल कलेज शिक्षण अस्पतालमा कार्यरत वरिष्ठ फिजिसियन डा. श्याम विक नेतृत्वको चिकित्सक टोली जाजरकोटको भूकम्प प्रभावितका विकट गाउँमा बिरामीहरुको उपचारमा खटिएको छ ।

डा. श्याम विक र अर्का डा. देवेन्द्र आचार्य सहितको टोलिले भूकम्पले अत्याधिक क्षतिग्रस्त बनेको नलगाड-१ स्थित चिउरी गाउँमा घरघरमा पुगेर प्राभावितहरुका टोल र घरघरमा पुगेर स्वास्थ परामर्श देखी बिरामीहरुको उपचार गरिराखेका छन् ।

नलगाड नगरपालिकाको बिकट क्षेत्रमा पर्ने गाउँ यतिबेला पूरा गाउँ नै शोकमा डुबेको छ । १९८ घरधुरी भएको यस गाउँमा अधिकांश दलित परिवारको बसोबास रहेको छ । 

शुक्रबार राति जाजरकोटको रामिडाँडा केन्द्र बनाएर गएको भूकम्पले यस गाउँमा बढि नै मानवीय र भौतिक क्षति पुर्‍यायो । एकै बस्तीका १३ जनाले भूकम्पमा परी ज्यान गुमाए । ४ महिला, ५ बालबालिका र ४ जना पुरुषको भूकम्पले ज्यान लियो ।

यस गाउँका अधिकांश घरहरु पुर्ण रुपमा भूकम्पले ध्वस्त पारेको छ भने केही घर आंशिक रूपमा क्षति भएपछि करिब ७ सय परिवार घरबारविहीन भएका छन् ।