काठमाडौं, अखिल (क्रान्तिकारी) ले काठमाडौं महानगर निजी शिक्षण संस्थाको लुटको साक्षी बनिरहेको आरोप लगाएको छ ।

आईतबार सङ्गठनको बागमती प्रदेश उपत्यका विशेष समिती इन्चार्ज नवीन खड्काले एक प्रेस विज्ञप्ति जारी गर्दै काठमाडौं महानगर निजी विद्यालायहरुको लुटको साक्षी बनेर शिक्षा क्षेत्रको व्यापारीकरण, निजीकरण र दलालीकरणमा सहभागी बनेको आरोप लगाएका छन् ।

काठमाडौ महानगर भित्रको शैक्षिक सुधारका लागि विगत देखि नै मागपत्र बुझाउने, रचनात्मक कार्यगर्ने, शैक्षिक बेथितिका विरुद्ध संघर्ष गर्ने गरिरहेको स्मरण गराउदै पछिल्लो समययता बालेन प्रशासनद्वारा संगठनका जायज मागहरु प्रती वेवास्ता गर्ने, स्टन्टबाजीमा रमाउने, अपरिपक्व निर्णय गरेर बालहठ देखाएको आरोप लगाए ।

सङ्गठनद्धारा जारी गरिएको उक्त विज्ञप्तिमा भनिएको छ, ‘विगतमा पनि विद्यार्थी संगठनलाई धार्मिक संघसंस्था र एनजीओ आईएनजिओ सङ्ग दाज्ने कुराको प्रतिरोध गरिएको थियो । राणा शासन फाल्ने देखि गणतन्त्र ल्याउने विद्यार्थी आन्दोलनको गौरवशाली इतिहास माथी अज्ञानि बालेनद्वारा भद्दा मजाक गर्ने र घुमाउरो तरिकाले विद्यार्थी अधिकारका लागि लडने संस्था माथि प्रतिबन्ध लगाउने कुकर्मको विरोध गरिएको हो । तर त्यसको उल्टो व्याख्या गरि विद्यालयमा राजनीति गर्न पाउनुपर्छ भन्ने माग गरेको कुरा भ्रमपुर्ण प्रचार गरियो । हाम्रो संगठन विद्यालयमा घिन लाग्दो फोहरी राजनीति गर्दैन हामी शैक्षिक सुधारका लागि रचनात्मक कार्य गर्छौं , बेथिति , भ्रष्टाचार र अन्याय/अत्याचारका विरुद्ध विद्यार्थी र आमजनताहरु माझ संगठित तवरले सचेतना फैलाउने कार्य गर्दछौं । अरु लुटिखाने यहि व्यवस्थाका मतियारहरु सङ्ग हामीलाई तुलना नगर्न खबरदारी गर्दछौं ।’

त्यस्तै विज्ञप्तिको अगाडी लेखिएको छ, ‘हामी बालेन प्रशासनलाई हाम्रो संगठनको तर्फबाट बुझाईएका मागहरु सम्बोधन गर्न, महानगर भित्रका शैक्षिक विकृती सुधार गर्न, नेपाल संविधान २०७२ द्वारा प्रदत्त – प्रत्येक नागरिकलाई आधारभूत शिक्षामा पहुँचको हक हुने, प्रत्येक नागरिकलाई राज्यबाट आधारभूत तहसम्मको शिक्षा अनिवार्य र निःशुल्क तथा माध्यमिक तहसम्मको शिक्षा निःशुल्क पाउने हक बारे अध्ययन गरि शिक्षा ऐन नितिनियम र विद्यालय संचालन निर्देशिका अनुरुप कार्य गर्न सचेत गराउदछौ । निजि विद्यालायहरुको लुटको साक्षी बनेर शिक्षा क्षेत्रको व्यापारीकरण, निजीकरण र दलालीकरणमा सहभागी बन्ने, सरकारी/सामुदायिक विद्यालयले असुल गरिरहेका चर्को शुल्क खारेज गर्न नसक्ने अनि विद्यार्थी संगठनले जायज मागका लागि बाध्यात्मक अवस्थामा लगाएको ताला फुटाएर ठुलै विश्वविजेता बनेको घमण्ड गर्ने कुराको हामी कडा प्रतिरोध गर्दछौं ।’

यस्तो छ विज्ञप्ति