नयाँ पाठ्यक्रम प्रारूपविरुद्धको रिट सर्वोच्चद्धारा खारेज

कक्षा ११ मा नयाँ पाठ्यक्रम पढाउन बाटो खुल्यो

काठमाडौँ, विद्यालय शिक्षाको राष्ट्रिय प्रारुप, २०७६ कार्यान्वयन नगर्न सर्वोच्चमा परेको रिट खारेज भएको छ । रिट खारेज भएसँगै कक्षा एक र ११ मा नयाँ पाठ्यक्रमअनुसार पढाई सञ्चालन गर्ने बाटो खुलेको हो ।

न्यायाधीशद्वय तेजबहादुर केसी र प्रकाशकुमार ढुंगानाको इजलाशले उक्त रिट खारेज गर्ने आदेश जारी गरेको हो ।

पाठ्यक्रम विकास केन्द्रले नयाँ पाठ्यक्रम अनुसारको पढाई सञ्चालन गर्न मातहतका सबै निकायहरुमा परिपत्र गरेको भएपनि गत असोज ३० गते नयाँ पाठ्यक्रम कार्यान्वयन नगर्न माग गर्दै भगवता अर्यालसहितले सर्वोच्चमा रिट दायर गरेका थिए ।

विद्यालय तहको पाठ्यक्रम बनाउने विषय स्थानीय तहको भएको भन्दै परेको रिट सर्वोच्चले खारेज गरेसँगै अब नयाँ पाठ्यक्रम नै लागू हुने भएको हो । यसअघि अधिकांश विद्यालयले नयाँ पाठ्यक्रमअनुसार पढाई सञ्चालन गरेपनि केही विद्यालयहरुले भने पुरानै पाठ्यक्रमअनुसार पढाई सञ्चालन गरिरहेका थिए ।

यसअघि न्यायाधीश पुरुषोत्तम भण्डारीको एकल इजलाशले कार्तिक १९ गते नयाँ पाठ्यक्रम तत्काल कार्यान्वयन नगर्न अल्पकालिन अन्तरिम आदेश दिएको थियो । तर आज सर्वोच्चका न्यायाधीशहरु केसी र ढुंगानाको इजलाशले रिट नै खारेज गरेको हो ।