खार्तुम, सुडानका प्रधानमन्त्री अब्दल्ला हामडोकलाई लक्षित गरीट बम विस्फोट गराइएको छ । सुडानको राजधानी खार्तुममा उनीमाथि बम आक्रमणको प्रयास भएको प्रहरीले जनाएको छ ।

प्रधानमन्त्री हामडोकको परिवारका अनुसार प्रधानमन्त्री सकुशल र सुरक्षित छन् । उनी कार्यालय जाँदा बाटोमा बम विष्फोट गराइएको त्यहाँको सरकारी टेलिभिजनले जनाएको छ । उनलाई तत्कालै सुरक्षाकर्मील सुरक्षित स्थलमा लगेका थिए । आक्रमणको तत्काल कसैले जिम्मेवारी लिएको छैन ।

अनलाइनमा पोष्ट गरिएको फुटेजमा प्रधानमन्त्री हामडोक चढेको सवारी साधन सहित दुईवटा सेता, जापानी सवारीसाधन सडकको किनारामा देखिएका छन् । ती सवारी साधनका झ्यालका शिशाहरु फुटेका छन् । विस्फोटमा अर्को एउटा गाडी पनि क्षतिग्रस्त भएको देखाइएको छ ।

प्रजातन्त्र समर्थकको चर्को दबाबबीच गत अगष्टमा हामडोक सुडानको प्रधानमन्त्री बनेका थिए । जनप्रदर्शन व्यापक बन्दै गएपछि सुडानको सेनाले गत अप्रिलमा तत्कालीन राष्ट्रपति ओमर अल बशीरलाई सत्ताच्यूत गरी सेनाले सत्ता आफ्नो हातमा लिएको थियो ।

महिनौंको छलफलपछि सेना र प्रजातन्त्रवादी आन्दोलनबीच गत अगस्टमा सत्ता–साझेदारी गर्नेगरी सम्झौता भएको थियो । सम्झौता अन्तर्गत ११ सदस्यीय संयुक्त सैन्य–नागरिक सार्वभौम परिषद स्थापना गरिएको थियो ।

यस परिषदले सुडानमा आगामी तीन वर्ष शासन सञ्चालन गर्ने र प्रधानमन्त्रीमा नागरिक प्रतिनिधिका रुपमा हामडोकलाई नियुक्त गर्ने सहमति भएको थियो । तर सैन्य जनरलहरू देशको शासनसत्ता नागरिक नेतृत्वको प्रशासनलाई हस्तान्तरण गर्न त्यति इच्छुक देखिएका छैनन् ।