अन्टाक्या, सिरियाले टर्कीले आफ्ना दुई लडाकु विमान खसालेको जनाएको छ । सिरियाको सरकारी समाचार संस्था सानाले जनाएअनुसार मुलुकको उत्तरपश्चिमी क्षेत्रमा टर्किस सेनाको कारवाहीमा आफ्ना दुई लडाकु विमान खसेको जनाएको हो ।

केही दिनअघिमात्रै सिरियाको इडलिब प्रान्तमा सिरियाली सेनाको कारवाहीमा ३३ टर्किस सैनिक मारिएपछि टर्की र सिरियाबीच तनाव उत्कर्षमा पुगेको छ । यसअघि आइतबारमात्र टर्कीले सिरियाली लडाकु विमान खसालेको दाबी गरेको थियो । यद्यपि पछि अन्तर्राष्ट्रिय सञ्चारमाध्यमले उक्त विमान सिरियाली वायुसेनाको नभई टर्कीकै चालकरहित ड्रोन भएको जनाएका थिए ।

टर्किस समाचार संस्थाहरुले टर्कीको आक्रमणमा उक्त ड्रोन खसाल्न प्रयोग भएको सिरियाली हवाई प्रतिरक्षा प्रणाली समेत ध्वस्त बनाएको जनाएका छन् । सिरियाली सरकारविरुद्ध युद्धरत विद्रोहीलाई सहयोग गर्नका लागि तैनाथ ३३ टर्किस सैनिक सिरियाको इडलिब प्रान्तमा सिरियाली वायुसेनाले गरेको कारवाहीमा मारिएका थिए । उक्त आक्रमणमा अरु २९ टर्किस सैनिक घाइते भएका थिए ।

यसअघि टर्कीका रक्षामन्त्री हुलुसी अकारले सिरियाविरुद्ध ‘अपरेसन स्प्रिङ शिल्ड’ नामक सैनिक कारवाही थालेको घोषणा गरेका थिए । उनी यतिबेला सिरियाको इडलिब प्रान्तसँग सीमा जोडिएको हाते प्रान्तमा रही सिरियामा टर्किस सैनिक आक्रमणको कमाण्ड गरिरहेका छन् ।

पछिल्लो सैनिक कारवाहीका क्रममा टर्कीले एउटा सैनिक ड्रोन, ८ वटा हेलिकोप्टर, १०३ ट्यांक, ७२ वटा लामो दूरीसम्म मार हान्न सक्ने हतियार, ३ हवाई रक्षा प्रणाली सिरियाली भूमिमा प्रयोग गरिएको टर्कीको अनादोलु समाचार संस्थाले जनाएको छ । टर्कीको सैनिक कारवाहीका क्रममा हालसम्म सिरियाली सेनाका २,२१२ सैनिकलाई परास्त गरिसकिएको टर्कीको दाबी छ ।