काठमाडौं, नेपालस्थित जर्मन दूतावासले असुरक्षा बढेको भन्दै नेपाल सरकारलाई पत्र लेखेको छ । पत्रमा दूतावास परिसरमा भएको अतिक्रमणलाई हटाउन माग गरिएको छ ।दूतावासले परराष्ट्र मन्त्रालयलाई लेखेको पत्रमा अतिक्रमण रोक्न नेपाल सरकारले उचित कदम नचालेकोमा असन्तुष्टी जनाइएको छ ।

पत्रमा दूतावासले शिशिर नाहाटाको प्राविधिक टिमले दूतावासको पर्खाल भत्काउने र त्यसलाई आफ्नो हुने गरी निर्माण गर्ने घोषणा गरेको दाबीपछि अतिक्रमण बढेको उल्लेख छ ।
सम्बन्धित अधिकारी तथा छिमेकीहरुसँग छलफलबिना नै नाहाटाले दूतावासको पर्खाल आडमा खन्ने काम गरेको दूतावासले जनाएको छ। नाहाटाको उक्त कार्यलाई दूतावासविरुद्धको भौतिक आक्रमणको रुपमा लिइएको जर्मनी दूतावासले जनाएको छ। यसलाई दूतावासले कूटनीतिक मामिला सम्बन्धि भियना कन्भेन्सनविरुद्धको कार्य भनेको छ।

जर्मन दूतावासले आफ्नो सम्पत्तिको रक्षा गरिदिन सुरक्षा माग्दै झण्डै दुई महिना अघि पनि पत्र लेखेको थियो । सो पत्रको पनि वेवास्ता भएपछि दूतावासले परराष्ट्र मन्त्रालयलाई अर्को पत्र पठाएको हो ।
पहिलो पत्र सन् २०१९ डिसेम्बर ११ र दोस्रो पत्र सन् २०२० जनावरी ३० का दिन परराष्ट्रलाई लेख्दै भियना कन्भेन्सन विपरीत कार्य भएकोमा आपत्तिसमेत जनाएको छ।