विराटनगर, कार्यवाहक प्रधानन्त्री ईश्वर पोखरेलले आलोपालो प्रधानमन्त्री बन्ने विषयमा पार्टीमा सहमति नभएको दाबी गरेका छन् ।

नेकपाका अध्यक्ष पुष्पकमल दाहाल ‘प्रचण्ड’ले पार्टी एकताका बेलामा गरिएको आलोपालो सहमति कार्यान्वयन नभएको भन्दै असन्तुष्टि जनाइरहेको बेला पोखरेलको यस्तो भनाइ सार्वजनिक भएको हो ।

शुक्रवार विराटनगरमा पत्रकारहरुसँग कुरागर्दै कार्यवाहक प्रधानन्त्री पोखरेलले आलोपालो प्रधानन्त्री बन्ने विषयमा कुनै संस्थागत सहमति नभएको बताएका हुन् ।

‘सहमतिकै आधारमा पार्टी चलिरहेको छ र सहमति अनुसार नै दुई जना अध्यक्ष भएर पार्टी चलेको छ’ पोखरेलले भने,‘आलोपालो प्रधानन्त्री बन्ने विषयमा कुनै संस्थाथत सहमति भएको छैन ।’

उनले पार्टी एकता राष्ट्रिय आवश्यकता भएको बताउँदै यसमा आँच आउने काम कसैले गर्न नहुने बताए ।

कावा प्रधानमन्त्री पोखरेलले दुई पार्टी अध्यक्षबीच नियमित वार्ता र छलफल भइरहेको हुँदा सञ्चारमाध्यममा आएको जस्तो कुनै पनि विवाद नरहेको दाबी गरे ।