काठमाडौँ,आन्तरिक समिकरणका कारण सत्तारुढ दल नेपाल कम्युनिष्ट पार्टी (नेकपा)को पोलीटव्यूरो गठनको घोषणा अझै लम्बिने संकेत देखिएको छ।

पार्टी स्रोतका अनुसार एकातिर पार्टी अध्यक्ष एवम् प्रधानमन्त्री केपी शर्मा ओली र पार्टी सचिवालय सदस्य एवम् गृहमन्त्री रामबहादुर थापा (बादल)बीच नजिकिँदो राजनीतिक समिरकण र अर्कोतिर बादल र पार्टीका अर्का अध्यक्ष पुष्पकमल दाहाल (प्रचण्ड)बीच बढ्दो अविश्वासको दूरीले त्यसलाई असर गरेको बताइएकाे छ ।

नेकपाभित्र पूर्व एमाले र माओवादीलाई समेटेर एक सय ४७ सदस्यीय पोलिटव्यूरो गठन गर्ने सहमति भएपनि माओवादीको भागमा परेका ६६ सदस्यमा बादलले कति पाउने भन्नेमा निर्णय हुन सकेको छैन, जसले समिरकणमा अर्थ राख्छ ।

प्रधानमन्त्री ओली संसद बाहेक पार्टीका प्राय सबै निकायमा अल्पमतमा परेका कारण उनी सकेसम्म पोलिटव्यूरो आफू अनुकुल गठन र घोषणा गर्ने मनस्थितिमा रहेको स्रोत बताउँछ।

बादल र प्रचण्डबीचको बढ्दो दूरीको फाइदा लिने मनस्थितिमा प्रधानमन्त्री ओली रहेको स्रोतको दाबी छ। नेकपाले पार्टी गठन भएको झण्डै एक वर्षपछि गत वैशाख ९ गते जिल्ला तहको नेतृत्व चयन गरेको थियो । तर उक्त नेतृत्वलाई लिएर पार्टीका वरिष्ठ नेता माधव कुमार नेपाल र उनको समूहले असन्तुष्टी जनाएको थियो।

पार्टी एकताको पूर्णतालाई लिएर सकसमा परेको नेकपाले हालसम्म पनि अनुशासन आयोग गठन गर्न सकेको छैन । यस्तै प्रवासका संगठनहरु पनि उसले गठन गर्न नसकेपछि आफ्नै नेता तथा कार्यकर्ताहरुबाट आलोचित बनेको छ ।

चुनावी गठनबन्धनसँगै पूर्व एमाले र माओवादीले आफ्नो एकल हैसियत समाप्त गर्दै गत वर्ष जेठ तीन गते नेकपा गठन गरेका थिए।

सबै भन्दा ठूलो पार्टीले एकतालाई समयमै नटुग्याउँदा र विकासका प्रतिवद्धताहरु पूर्णरुपमा कार्यान्वयनमा नल्याउँदा पार्टीको तल्लो तहमा निराशा पैदा भएको छ।

लामो समय पार्टी विघटनको अवस्थामा रहँदा पूर्व एमाले र माओवादीमा उच्च हैसियत बनाएका जिल्ला तहका नेताहरु नेतृत्वसँग असन्तुष्ट बनेका छन्।