देशभर बन्दका कारण जनजीवन प्रभावित भएको छ । नेपाल कम्युनिस्ट पार्टीले आफ्ना पार्टीका स्थायी समिति सदस्यसहितलार्इ गिरफ्तार गरेको भन्दै आज नेपाल बन्दको आह्वान गरेको हो । नेकपाको युवा संगठनको राष्ट्रिय सम्मेलनमा भाग लिन गएका बेला पूर्वको बिराटनगरबाट आइतबार प्रहरीले नेकपाका स्थायी समिति सदस्य हेमन्तप्रकाश ओली सुदर्शन र पोलिटब्यूरो सदस्य पदम रार्इसहित २९७ जनालार्इ गिरफ्तार गरेको थियो । पछि दुर्इ जना नेतालार्इ राखेर बाँकी सबैलार्इ प्रहरीले रिहा गरिसकेको छ । उनीहरुको रिहार्इको माग गर्दै नेकपाले आज बन्द आह्वान गरेको हो ।

बन्दका कारण देशभरका शैक्षिक संस्था पूरै बन्द छन । त्यसैगरी यातायात र बजार पनि बन्द रहेका छन् । राजधानी काठमाडौंसहित देशभर लामो र छोटो दुरीका सवारी साधनहरु चलेका छैनन् । यातायात, शैक्षिक संस्था, उद्योगधन्दा कलकारखाना ठप्प छन् । बन्दमा सार्बजनिक र निजी सवारीसाधन बाहेक प्रेस, एम्बुलेन्स, शब बहान, दुध बोक्ने गाडी र पानी बोक्ने गाडीजस्ता अत्यावश्यक सवारीसाधनलाई चल्न दिइने नेकपाले जनाएको छ ।

यस्तै बन्दको अवज्ञा गरेको भन्दै बन्दकर्ताहरुले मोरङको विराटनगरमा विहानै दुई मालबाहक ट्रकमा आगजनी गरेका छन् ।

यसैबीच प्रहरीले सोमवार साँझ देशभरिबाट नेकपाका थप कार्यकर्ताहरुलार्इ प्रहरीले गिरफ्तार गरेको छ । बन्दको पूर्वसन्ध्यामा नेकपाले मशाल जुलुस निकालेको थियो । मशाल जुलुसमा सहभागी भएको भन्दै देशभरबाट प्रहरीले एक दर्जनभन्दा बढी कार्यकर्तालार्इ गिरफ्तार गरेको नेकपाले जनाएको छ ।