आगामी निर्वाचनका लागि १० अर्ब भन्दा बढी रकम खर्च गर्ने निर्वाचन आयोगको कार्यक्रम रहेको छ । त्यसमध्ये २ अर्ब भन्दा बढी रकम त भ्रमणमा मात्र खर्च गर्ने योजना आयोग रहेको छ । प्रतिनिधिसभा र प्रदेशसभाको निर्वाचनका लागि १० अर्ब ५३ करोड ४३ लाख ४३ हजार रुपैयाँ खर्च हुने देखिएको छ ।आगामी निर्वाचनका लागि भ्रमण खर्च मात्र २ अर्ब २६ करोड ६५ लाख बजेट छुट्टयाइएको छ । यो रकम निर्वाचनमा खटिने कर्मचारीको भ्रमण शीर्षकमा जाने छ । भ्रमण खर्च मात्र कूल रकमको २१ प्रतिशत हुने देखिएको छ । ७७ जिल्लाका १ सय ६५ प्रतिनिधिसभा र ३ सय ३० प्रदेशसभा रहेका छन् । गत स्थानीय तहको निर्वाचनमा ३८ लाख स्थानीय भत्तामा र अन्य भत्तामा एक अर्ब एक करोड रुपैयाँ खर्च भएको थियो ।

आयोगले निर्वाचन शिक्षा तथा अन्य कार्यक्रमको अनुगमन तथा मूल्यांकनका लागि १९ करोड आठ लाख खर्च गर्ने भएको छ । हतारमा निर्वाचन गर्ने परिपाटीले निर्वाचनका बेला गरिने कार्यक्रमको अनुगमन गर्न आयोगले त्यति नभ्याए पनि यो शीर्षकमा रकम भने छुट्याइएको छैन । आयोगले अहिले नमुना मतपत्र र निर्वाचन सामग्रीसमेत छापिसकेको छ ।

कात्तिक २५ गतेदेखि मतदाता शिक्षा कार्यकर्ता परिचालन समेत भइसकेको छ । त्यस्तै आयोगले आगामी चुनावका लागि ५ करोड ८ लाख ५० हजार इन्धनमा खर्च गर्ने भएको छ । यसअघिको स्थानीय तह चुनावमा इन्धनमा २ करोड ७७ लाख रुपैयाँ खर्च गरे पनि प्रतिनिधि तथा प्रदशेसभा चुनावमा भने यो शीर्षकअन्तर्गत खर्च छुट्याएको छैन । आसन्न निर्वाचनका लागि ३ अर्ब ७ करोड ७४ लाख खर्च गरिने भएको छ । स्थानीय चुनावमा कार्यक्रम खर्च शीर्षकमा एक अर्ब ५४ करोड रुपैयाँ खर्च गरिएको थियो ।