काबुल,अफगानिस्तानमा संयुक्त सुरक्षा अभ्यासका क्रममा अफगान सैनिकको पोसाक लगाएका एक व्यक्तिले अमेरिकी तथा अफगान सैनिकलाई लक्षित गरी आक्रमण गर्दा कम्तीमा दुई अमेरिकी सैनिक मारिएका छन् ।

अफगानिस्तानको ननगरहार प्रान्तमा संयुक्त सैनिक अभ्यासका क्रममा अफगान सैनिकको पोसाक लगाएका एक व्यक्तिले अमेरिकी सैनिकलाई लक्षित गरी आक्रमण गरेका थिए । आक्रमणकारीले अत्याधुनिक मेसिनगनले अमेरिकी सैनिकलाई लक्षित गरी गोली चलाएको अन्तर्राष्ट्रिय सञ्चारमाध्यमले जनाएका छन् । आक्रमणमा ६ अमेरिकी सैनिक घाइते समेत भएका छन् ।

आक्रमणमा कारवाहीमा केही अफगान सैनिकको हताहती भएको भनिएपनि यसबारे स्पष्ट विवरण सार्वजनिक हुन सकेको छैन । अमेरिकी सञ्चारमाध्यमले घटनालाई ‘आन्तरिक आक्रमण’ को संज्ञा दिएपनि सुरक्षा अधिकारीले आक्रमणको उद्देश्य तथा कारणबारे जानकारी संकलन तथा विश्लेषण गर्ने काम भइरहेकाले यसबारे तत्काल स्पष्ट नभइसकेको जनाएका छन् ।

कारवाहीका क्रममा आक्रमणकारीको समेत मृत्यु भएको अफगान अधिकारीले जनाएका छन् । संदिग्ध इस्लामवादी लडाकुले अफगान सुरक्षा फौजमा घुसपैठ गरी आक्रमण गरेको हुनसक्ने अनुमान गरिएपनि कुन समूहले आक्रमण गराएको भन्नेबारे केही खुल्न सकेको छैन । अफगानिस्तानमा अफगान सुरक्षा बलका सदस्यले अमेरिकी सैनिकलाई लक्षित गरी घातक आक्रमण गर्दै आएपनि पछिल्ला वर्षहरुमा यस्तो आक्रमणमा निकै कमी आएको बताइन्छ । यस आक्रमणको जिम्मा तत्काल कुनै समूहले लिइसकेको छैन ।