काठमाडौं, समृद्धि कृषि तथा पशुपंक्षी फर्मकी सञ्चालक गीता कुमारी खड्का (बुढा) इमर्जिङ इन्टरप्राइजिङ वुमन अफ दि इयर अवार्डबाट सम्मानित भएकी छन् । न्यू बिजनेश एज लिमिटेडको आयोजनामा फागुन १ गते भएको छैटौं न्यूबिज बिजनेश वुमन समिट एन्ड अवार्डस्–२०२६ अन्तर्गत खड्का उक्त अवार्डबाट सम्मानित भएकी हुन् ।

प्लस टु पास गरेकी खड्काले सञ्चालन गरेको फर्ममा हाल ६ जनाले रोजगारी पाइरहेका छन् । ९ जनामध्ये २ जना दक्ष र ४ अर्धदक्ष कामदार रहेको जानकारी सञ्चालक खड्काले दिएकी छन् ।

२०७८ असोज ५ गते दर्ता भएको यस कम्पनीमार्फत आफू स्वरोजगार भई अरुलाई पनि रोजगारी दिन सफल भएकोमा खड्का खुसी व्यक्त गर्छिन् । उनको फर्मबाट मोरिङ्गा पाउडर, कालो बेसार र मोरिङ्गा कोशा उत्पादन तथा विक्री वितरण हुने गरेको छ । मोरिङ्गा पाउडर र कालो बेसार वीरगन्ज, सुर्खेत, दैलेख, जाजरकोट, नेपालगञ्ज र काठमाडौंमा विक्री वितरण हुँदै आएको र मोरिङ्गा कोशा कर्णाली प्रदेशभरी र नेपालगञ्ज, काठमाडौं र वीरगन्जमा विक्री हुने गरेको सञ्चालक खड्काले जानकारी दिइन् ।

आर्थिक वर्ष ०७९/८० र ०८०/८१ मा ३ लाख रुपैयाँ खुद नाफामा रहेको आफ्नो कम्पनी गत आर्थिक वर्ष ०८१/८२ मा भने २ लाख रुपैयाँ खुद नाफामा रहेको खड्काको भनाइ छ ।

गत वर्ष विक्री आम्दानी अघिल्ला वर्षको तुलनामा घटेकाले खुद नाफा कम भएको उनले बताइन् । उनका अनुसार गत वर्ष १९ लाख ५० हजार विक्री आम्दानी भएको थियो । अघिल्लो आर्थिक वर्ष ०८०/८१ मा भने २९ लाख रुपैयाँ विक्री आम्दानी भएको उनको भनाइ छ ।