एजेन्सी | पछिल्लो समय इजरायल र इरानबीचको तनाव खुला युद्धमा रूपान्तरण हुँदै गएको छ। दुवै मुलुकले एक अर्कालाई लक्षित गरी लगातार हवाई आक्रमण गरिरहेका छन्। यस्तै परिस्थितिमा अमेरिका पनि यो युद्धमा संलग्न हुन सक्ने संकेत देखिएको छ।

सीबीएस न्यूजको रिपोर्टअनुसार, अमेरिकी पूर्व राष्ट्रपति तथा रिपब्लिकन पार्टीका सम्भावित उम्मेदवार डोनाल्ड ट्रम्पले इजरायलको पक्षमा उभिन सक्ने अभिव्यक्ति दिएका छन्। ह्वाइट हाउसको सिचुएशन रुममा मङ्गलवार सम्पन्न एक उच्चस्तरीय बैठकमा ट्रम्पले इरानमाथिको आक्रमणमा इजरायललाई समर्थन दिन सक्नेबारे धारणा व्यक्त गरेका हुन्।

विशेषगरी इरानको फोर्डोस्थित परमाणु कार्यक्रम सञ्चालन केन्द्र लगायतका संवेदनशील क्षेत्रमा इजरायलले आक्रमण गरिरहेकै बेला ट्रम्पले यस्तो सोच बनाइरहेको जानकारी पाँच जना उच्च स्रोतलाई उद्धृत गर्दै सीबीएसले जनाएको छ।

यद्यपि, यस विषयमा ट्रम्पका निकट सल्लाहकारहरूबीच पूर्ण सहमति भने जुटिनसकेको बताइएको छ। त्यसैले यो विषय सिचुएशन रुममै थप गम्भीर छलफलको एजेन्डा बन्ने अपेक्षा गरिएको छ।

यसैबीच, इजरायली सेनाले इरानको राजधानी तेहरान नजिकै रहेका मिसाइल उत्पादन केन्द्रहरूमा लक्षित आक्रमण गरिरहेको जनाएको छ। दुबै मुलुकबीच आक्रमण प्रतिआक्रमणको श्रृङ्खला जारी रहेकाले यो युद्ध अझै गहिरिन सक्ने खतरा बढ्दै गएको छ।