काठमाडौँ, नेपाल कम्युनिस्ट पार्टी (नेकपा)का अध्यक्ष तथा प्रधानमन्त्री केपी शर्मा ओलीले पार्टीलाई बदनाम गर्नेहरु अहिले सडमा कुर्लिरहेको आरोप लगाएका छन् ।बुटवलमा आयोजित आमसभामालाई सम्बोधन गर्दै ओलीले यस्तो बताएका हुन ।

‘अहिले पार्टी एउटै विचारमा अनुशासित भएर गतिशिल भएको छ, देश बनाउने संकल्पसहित अघि बढेको छ, सम्बोधनकै क्रममा प्रधानमन्त्री ओलीले भने, ‘अब हामी निरास हुनुपर्ने अवस्था छैन, कठैबरा भन्नुपर्ने गएका छैनन, पार्टीको बदनाम गर्नेहरु, मुलुकको समृद्धि नचाहानेहरु मात्रै बाहिरिएका हुन् । उनीहरु अहिले सडकमा डम्फू बजाइरहेका छन् । ’

उनले नेपालभरीको होइन लुम्बिनी प्रदेशका मानिसको उपस्थितिलाई लिएर गौरव गरे । उनले देशमा आन्दोलन विभाजित भएका बेला, कुनै पनि पार्टी क्रियाशील हुन नसकिरहेको बेला आफूले एकता र एकीकरणको अभियान शुरु गरेको बताए । उनले एमाले र माओवादी केन्द्रलाई मिलाउने अगुवाई गरेको भए पनि केही मानिसले देश बनाउने नभइ आफू बन्ने उद्देश्य नछोड्दा यो अवस्था सिर्जना भएको बताए ।

उनले गुट बलियो बनाउने गलत अभ्यास गर्नेहरुकै कारण यो अवस्था आएको बताए ।उनले पार्टी नफुटेको यो उपस्थितिले देखाएको बताउँदै कही उद्देश्य नमिलेकाहरुमात्र बाहिरिएको बताए ।‘उनीहरु बाहिरिएर आत्तिएका छन्, डम्फू बजाइरहेका छन्, चुनाव हुने विषयलाई प्रतिगमन भनिरहेका छन् । ताजा जनादेशमा जानै हुँदैन भने तपाइँहरुको कस्तो व्यवस्था खोजेको ?,’ प्रधानमन्त्री ओलीले प्रश्न गरे ।

प्रधानमन्त्री ओलीले सरकार ढाल्ने काम आफ्नै पार्टी भित्र भएको बताए । सामाजिक परिवर्त, समृद्धि, सुशासन कसरी ल्याउन सकिन्छ भन्ने बाटोलाई समातेर अघि बढिरहेको बेला सरकार ढाल्ने प्रयत्नमा ‘दोहाल–नेपाल’समूह लागेको समेत आरोप लगाए ।उनले भने, ‘एकैचोटी प्रधानमन्त्रीले राजीनामा दिनुपर्छ भन्ने आवाज आयो । देश बनाउने कुरा उनीहरुसँग छैन, अध्यक्षबाट छोड्नुप¥यो भन्ने अर्को आवाज उठाए ।’

उनले नक्सा पारित गरेपछि उनीहरु आत्तिएको समेत आरोप लगाए । अरुले हिम्मत र आलोचना गरेका थिएनन् तर आफ्नै पार्टीबाट बिग्रहको आवाज उठाउने काम उनीहरुबाटै भएको समेत बताए ।उनले उहाँहरु हटेसँगै आयोगहरु बनेको बताउँदै तगारो को रहेछ भन्ने प्रमाणित भइसकेको बताए । अहिले पार्टी गतिशील भएको बताए ।
‘गएको तीन वर्षमा हामीले कहिल्यै यस्तो आमसभा गर्न सकेका थिएनौं,’ उनले भने, ‘हिजो पार्टी भित्र त्यही कुरा भन्थ्ये, अहिले सडकबाट उही कुरा गरिरहेका छन् ।’

उनले अहिले पार्टी एउटै विचारमा अनुशासित भएर गतिशिल भएको बताए । देश बनाउने संकल्पसहित अघि बढेको बताए । प्रधानमन्त्री ओलीले भने, ‘अब हामी निरास हुनुपर्ने अवस्था छैन ।’सामाजिक सुरक्षाका क्षेत्रमा उल्लेखनीय काम गरेको समेत उनले बताए । ओलीले भने, ‘हामीले असाधरण विकास गरेका कारण उनीहरु छट्पटाइरहेका छन् ।’