काठमाडौं, नेपालमा कोरोना भाइरस संक्रमणको अवस्था खराब हुँदै गएको स्वास्थ्य तथा जनसंख्या मन्त्रालयले जनाएको छ।

आज शुक्रबारको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले घना बस्ती भएका स्थानमा संक्रमितको संख्या बढिरहेको भन्दै सतर्क रहन आग्रह गरे। महामारीका बीच भइरहेका सडक आन्दोलन तथा जुलुसले झनै संक्रमण फैलाउन सहयोग गर्ने भएकाले मन्त्रालयले यस्ता गतिविधि नगर्न आग्रह गरेको छ।

डा. जागेश्वर गौतमले ६० वर्षमाथि उमेर समूहका मानिस र दिर्घरोगीलाई घरबाहिर ननिस्कन आग्रह गरेका छन्। निस्कनै परे जनस्वास्थ्यका मापदण्ड (मास्क, स्यानिटाइजर र सामाजिक दूरी) अपनाएर निस्कन मन्त्रालयले आग्रह गरेको छ। आज शुक्रबारमात्रै २ हजार २० जना कोरोना संक्रमित थपिएका छन् भने अहिलेसम्म ६१ हजार ५९३ जना संक्रमित भइसकेका छन् ।