काठमाडौं, कोरोनाभाइरस संक्रमणबाट थप ६ जनाको मृत्यु भएको छ । मृत्यु हुनेमा ललितपुर, पर्सा, बारा, कपिलवस्तु, रुपन्देही र कास्कीका १–१ जना रहेका छन् । कास्कीको पोखरामा कोरोना संक्रमणबाट एक महिलाको मृत्यु भएको छ । पोखरा ११ की ३२ वर्षिया महिलाको कोरोना संक्रमणबाट मृत्यु भएको हो । भदौ ७ गते कोरोना संक्रमण पुष्टि भएकी ती महिला पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालको आइसोलेसन कक्षमा उपचाररत थिइन् ।

उनको आज बिहान ८ बजे मृत्यु भएको पोखरा स्वास्थ्य विज्ञान प्रतिष्ठानका निर्देशक डाक्टर अर्जुन आचार्यले जानकारी दिए । यो सँगै पोखरामा कोरोना संक्रमणबाट मृत्यु हुनेको संख्या ३ पुगेको छ । यसैगरी बुटवलस्थित लुम्बिनी प्रादेशिक अस्पतालको कोरोना विशेष अस्पतालमा उपचाररत कपिलवस्तुका थप एक जना कोरोना संक्रमितको मृत्यु भएको छ । कपिलवस्तुको कपिलवस्तु जिल्लाको तौलिहवा नगरपालिका–१ का ५० वर्षीय पुरुषको गतराति उपचारका क्रममै मृत्यु भएको कोराना विशेष अस्पतालका फोकल पर्सन डा सुर्दशन थापाले जानकारी दिए ।

यही भदौ ५ गते संक्रमण पुष्टि भएर अस्पताल भर्ना भएका उनमा उच्च रक्तचाप, मधुमेह र रक्तअल्पताजस्ता समस्या थिए । बुटवलमै उपचाररत अर्की एकजना संक्रमित महिलाको पनि कोरोनाकै कारण मृत्यु भएको छ। रुपन्देहीको तिलोत्तमा नगरपालिका २ जानकीनगरकी ७० वर्षीया कोरोना संक्रमित महिलाको आज बिहान १० बजेतिर मृत्यु भएको अस्पतालका फोकल पर्सन थापाले पुष्टी गरे ।

साउन २६ मा संक्रमण पुष्टि भएकी उनको घरमा आइसोलेशनमै बसेर उपचार जारी थियो। घरमा उपचारका क्रममा स्वास्थ्यमा समस्या आएपछि थप उपचारका लागि साउन ३१ गते धागो कारखानास्थित कोरोना अस्पतालमा भर्ना गरिएको अस्पताले जनाएको छ । उनलाई ४ दिन अघिदेखि भेन्टिलेटरमा राखेर उपचार जारी रहेको थियो ।

यसैगरी बाराको सुवर्ण गाँउपालिका वडा नम्बर ४ बस्ने एक २३ वर्षीय गर्भवती महिलाको पनि कोरोनाबाट मृत्यु भएको बारा प्रहरी प्रवक्ता डिएसपी गौतम मिश्रले पुष्टी गरे । भदौ ८ गते स्वाब संकलन गरेर नारायणी उपक्षेत्रीय अस्पताल वीरन्ंजमा पठाएकोमा १० गते कोरोना पोजेटिभ रिपोर्ट आएपछि गर्भवती महिलालाई नारायणी उपक्षेत्रीय अस्पताल वीरगंजमा भर्ना गरिएको थियो ।

उपचारको क्रममा आज बिहान ६ बजेर ३० मिनेटमा उनको मृत्यु भएको हो । स्वास्प्रस्वासमा समस्या सृजना हुनुको साथ साथै ज्वरो र पखाला लागेकोमा उपचार हुँदै गर्दा निधन भएको अस्पतालले जनाएको छ । यसका साथै बारामा कोरोना भाइरस संक्रमणको कारण मृत्युु हुुनेको संख्या १५ पुुगेको छ ।

यसैगरी पर्साको वीरगन्जमा पनि कोरोना संक्रमणबाट थप एक जनाको मृत्यु भएको छ । मृतकमा वीरगञ्ज–१४ का ६२ वर्षीय पुरुष रहेका छन् । गण्डकस्थित अस्थायी कोभिड अस्पताल वीरगञ्ज हेल्थ केयरमा उनको बिहीबार बिहान मृत्यु भएको हो । यससँगै पर्सामा कोरोना संक्रमणबाट मृत्यु हुनेको संख्या ४५ पुगेको छ ।

यस्तै ललितपुरमा पनि कोरोना संक्रमणबाट विहिबार एक जनाको मृत्यु भएको छ । किस्ट अस्पतालमा उपचाररत ५५ वर्षीय पुरुषको आज मृत्यु भएको हो । गत भदौ ७ गते भर्ना भएका उनलाई ९ गते बुधबार कोरोना संक्रमण मृत्यु पुष्टि भएको अस्पताल स्रोतले जानकारी दिए ।