दाङ, देउखुरीको लमही कोइलाबास सडकखण्ड अन्तर्गत पर्ने देउखुरी सामुदायिक पुस्तकालयको अगाडी बिच सडकमा बिपरित दिसाबाट आएका दुई वटा मोटरसाइकल एक आपसमा ठोकिदा ठूलै दुर्घटना भयो । दुर्घटना स्थलमा वरीपरिका बस्तीका मानिसहरु घेरिए रमिते बनेर हेरिरहे तर कसैले पनि दुर्घटनामा परेका घाइतेहरुलाई उद्धार गर्ने तर्फ लागेनन् ।

घटना पत्ता लागेपछि सडकछेऊ घर भएकी खिमादेवी भण्डारीले प्राथमिक उपचारको बाकस बोकेर आइपुग्नुभयो । दुर्घटनामा परेकाहरुको कसैको टाउकोबाट रगत बगिरहेको थियो त कसैको हात खुट्टा नै भाँचिएको थियो । हत्तपत्त खिमा भण्डारी, तिलक परियार,भरतकुमार पन्त, सुजाता समाल र खिमा डाँगी लगायतको प्राथमिक उपचार टोली आएर घाईतेहरुको उद्धार गर्न सुरु गर्यो । कसैले हात खुट्टामा काप्री बान्दै थिए त कसैले बगिरहेको रगत रोक्न त्रिकोण पट्टी त कसैले रोलर पट्टी बाध्दै थिए ।

उता कसैले स्टेचरमा घाइतेहरुलाई बोकेर हस्पताल लैजादै थिए । छिनपछि टोलीले एम्बुलेन्स र प्रहरीलाई समेत खबर गर्यो र घटना स्थलमै प्राथमिक उपचार पाएका घाइतेहरुलाई अस्पताल पठाइयो । यो घटना भने वास्तविक होइन, तालिमका सहभागीहरुले प्रयोगात्मक सिप सिकिरहेको दृश्य हो । रिड नेपालद्धारा संचालित नेपालमा अपांगता समाबेशी बिपद् जोखिम न्यूनिकरण प्रबर्धन परियोजना अन्तर्गत देउखुरी सामुदायिक पुस्तकालय तथा स्रोत केन्द्रले आयोजना गरेको प्राथमिक उपचार तथा खोज उद्धार तालिमको दृश्यले तालिमका सहभागी र आयोजकहरुको मनै स्पर्श गरिरहेको पाइन्थ्यो ।

लाग्थ्यो यो कुनै वास्तविक दृश्य नै हो ।पुस्तकालय तथा स्रोत केन्द्रले कोभिड १९ को महामारी रोकथाम तथा नियन्त्रण गर्न समुदाय स्तरमा धेरै सचेतनाका गतिविधिहरु संचालन गरिरहेको र त्यस अन्तर्गत बिपद प्रतिकार्य र खोज उद्धारका लागि प्राथमिक उपचार तालिमको आयोजना गरेको अध्यक्ष गिरिराज भट्टले बताए । समुदाय र क्वारेण्टाइनहरुमा मास्क सेनेटाइजर वितरण र हात धुने टैंकीको ब्यवस्थापन संगै बिविध सचेतनामूलक कामहरु गर्दै आएको र भर्चुअल पद्धतिबाट मिटीङहरु गर्दै आएको भट्टले जानकारी दिए । यत्तिमात्र नभै अग्नीपिडीतहरुलाई राहात वितरण तथा कोभिड १९ माहामारीमा ज्याला मजदुरी गरेर छाक टार्ने नागरिकहरुलाई गढवा गाउँपालिका मार्फत राहत वितरणमा पनि सहयोग गरेको पुस्तकालयले जनाएको छ ।

प्राथमिक उपचार तालिममा घटनास्थलमा पुगी घाइतेहरुको खोज उद्धार गर्ने, काप्री बाध्ने, पट्टी बाध्ने, रक्तश्राब रोक्ने लगायतका थुप्रै बिधिहरु सिक्न पाएको तालिमका सहभागीहरुले बताएका छन् । सामाजिक दुरी कायम गरी आयोजना गरिएको सो तालिममा रिड नेपालका कामु निर्देशक दुर्गेस योगी, रिड नेपालका चिनकाजी श्रेष्ठ, रबिन्द्र अधिकारी र राजेश चौधरी लगायतले भर्चुअल पद्धतिबाट शुभकामना तथा शेसन समेत संचालन गरेका थिए ।

तालिममा प्राथमिक उपचार बिधि, घाइतेहरुको चेक जाँच, बेहोसी अवस्थाको पहिचन, घाउ, चोटपटक र पट्टीहरु आदीका बारेमा प्रयोगात्मक तथा सैद्धान्तिक अभ्यास रेडक्रस दाङका इन्कोर कार्यक्रम फिल्ड अधिकृत देवी प्याकुरेल र मोहनकुमार पाण्डेयले प्रशिक्षण दिएका थिए । उद्घाटन कार्यक्रमको संञ्चालन पुस्तकालयका सचिव तथा पत्रकार शिबराज पन्थीले गरेका थिए ।