देउखुरी, केहिदिन पहिले देउखुरीको गढवा स्थित रामपुरमा गाई काटेको बिरोधमा बिहिवार स्थानीयहरुले दोषी माथी कानूून सम्मत कार्बाहीको माग गर्दै ईलाका प्रहरी कार्यालयलाई दबाव दिएका छन् ।

दोषी पत्ता लगाएर कानून सम्मत ढंगले कार्वाही गर्नुपर्ने र दोषीलाई उन्मुक्ति दिन नहुने भन्दै स्थानीयले गढवा बजारका २ स्थानमा कोणसभा गर्नुको साथै सांकेतिक बिरोध स्वरुप : एक गढवा बजार समेत बन्द गरेका हुन् । यसैबीच गाई मालिक बिराहिम गुजरले इलाका प्रहरी कार्यालय गढवामा गोठबाट गाई चोरीगर्ने र राष्ट्रिय जनावरलाई काट्नेलाई कार्बाही गर्न भनि निवेदन दर्ता गरेका छन् ।

केहि दिन अघि गढवाको रामपुर गाउँको दक्षिणतर्फ कक्रहवा खोलामा गाईको बाच्छी काटेको र त्यसको खुट्टा, छाला र पुच्छर बोरामा हाली खाडल खनेर पुरिएको पाइएको हो । गढवा-६ रामपुर बस्ने प्रधान भनिने बिराहीम गुजरको गाईको बाच्छी-८ दिन पहिले गोठबाट हराएको गुजरले बताएका छन् । स्थानीयहरुलाई गुजरले गाइको बाच्छी गोठबाट हराएको बताएपछि स्थानीयले प्रहरीलाई खबर गरेका थिए ।

इलाका प्रहरी कार्यालय गढवाका प्रमुख भरतसिंह राठौर सहितको प्रहरीको टोलीले अनुसन्धान गर्दा कक्रहवा खोलामा गाइको खुट्टा, छाला र पुच्छर खाडलमा पुरेको अबस्थामा फेला पारेको थियो । घटना स्थलमा पुगी प्रहरीले शंकास्पद खडल उत्खनन् गर्दा खुट्टा, छाला, खुर र पुच्छर भेटिएको बताएको थियो । यस्तो घटना यहाँ पटक–पटक हुने गरेकोले निन्दनीय भएको भन्दै प्रहरीले चाँसो दिनुपर्ने र अनुसन्धानको दायरा फराकिलो बनाउन जरुरी भएको स्थानीयहरुले बताएका छन् । 

प्रहरीले घटना स्थलमा फेला पारेको सामाग्रीको अस्थिपंजर सहित मुचुल्का तयार पारेको र तीन जनालाई अनुसन्धानका लागि ल्याइएको बताएको छ ।  बिहिवार स्थानीयको दबाव पछि प्रहरीले घटनाको कडाईका साथ थप अनुसन्धान थालेको बताइएको छ । अनुसन्धानको क्रम जारी छ, प्रमाण खुलेको छैन ।

हालसम्म १० जनालाई जनालाई सोधपुछका लागि ल्याएका छौं, केही ब्यक्तिहरु हाम्रो नियन्त्रणमै छन् –पत्ता लागेमा नियमानुसार कार्बाही हुन्छ–प्रहरी प्रमुख राठौरले भने । दोषीहरु पत्ता लगाउन प्रहरीले हर संम्भव प्रयास गरिरहेको उनले बताए । घटनालाई साम्प्रदायिक ढंगबाट अगाडी नबढाउन समेत प्रहरी प्रमुख राठौरे स्थानीयलाई आग्रह गरेका छन् ।