काठमाडौ,  सत्तारूढ नेकपाको स्थायी कमिटीको बैठक सुरु भएको छ। सत्तारुढ नेपाल कम्युनिस्ट पार्टी (नेकपा) स्थायी कमिटी बैठकमा प्रधानमन्त्री केपी शर्मा ओली अनुपस्थित भएका छन् । बिहान ११ बजेदेखि बालुवाटारमा स्थायी कमिटी बैठक चलिरहेको छ । तर प्रधानमन्त्री ओली बैठकमा अनुस्थित रहेको स्रोतले बताएको छ ।

उनी बैठकमा अनुपस्थित हुनुकाे कारण भने बताइएकाे छैन । लामो रस्साकस्सीबीच बसेको नेकपा स्थायी कमिटी बैठकमा विभिन्न ७ वटा एजेन्डामा छलफल भइरहेको छ । नेकपा स्थायी कमिटीमा कोभिड–१९ रोकथाम, नियन्त्रण र उपचार, सीमा समस्या र समाधान, सरकारको कामको समग्र समीक्षा, पार्टी कामको समीक्षा र संगठनात्मक एकताका बाँकी कामहरू सम्पन्न गर्ने सम्बन्धमा, एमसीसीसहित ७ वटा एजेन्डामा छलफल भइरहेको छ ।

यस्तै बैठकका विविध एजेन्डामा रूकुम चौरजहारी घटना, नागरिकता विधेयक, संघ र प्रदेशसभाका सदस्यहरूको बैठक भत्ता कटौतीलगायतका विषयमा समेत छलफल हुनेछ । यसअघि बुधबार बसेको स्थायी कमिटी बैठकमा पार्टी अध्यक्षहरु केपी शर्मा ओली र पुष्पकमल दाहाल ‘प्रचण्ड’ ले सम्बोधन गरेका थिए ।