नेपालगञ्ज, बाँकेमा अवैधरुपमा खोलानाला तथा नदीजन्य पदार्थको अवैध उत्खनन् रोक्न स्थानीय प्रशासनले सक्रियता देखाएसँगै नदीजन्य पदार्थ बोकेका टिपर तथा ट्याक्टरहरु धमाधन पक्राउ पर्न थालेका छन् ।

प्रहरीको सेटिङमै अवैध उत्खनन् भइरहेको भन्दै त्यसलाई रोक्न चर्को आवाज उठेपछि बाँके प्रशासनले प्रहरी र अवैध नदीजन्य पदार्थ दोहन गरिरहेका तस्करहरुबीचको साँठगाँठ भत्काएको हाे  ।

प्रहरीकै संरक्षणमा सबैभन्दा बढी राप्तीसोनारीमा गाउँपालिकामा पर्ने खोलानाला तथा राप्ती नदीमा नदीजन्य पदार्थको अवैध उत्खनन् हुँदै आएको थियो । अवैध उत्खखन्मा संलग्नहरु धमाधम पक्राउ पर्न थालेका छन् ।

यसअघि शनिबार राती राप्ती नदीबाट अवैधरुपमा नदीजन्य पदार्थ बोकेर ल्याउँदै गरेका तीन वटा ट्याक्टरसहित ६ जनालाई नियन्त्रणमा लिएको बाँके प्रशासनले सोमबार विहान साढे २ बजे नौं वटा ट्याक्टरसहित १३ जना मानिसलाई नियन्त्रणमा लिएको बाँकेका प्रमूख जिल्ला अधिकारी रामबहादुर कुरुम्बाङ्गले जानकारी दिए ।

नेपालगन्जतर्फ आउँदै गरेका भे १ त ९२३७, भे १ त ८३६२, भे २ त १२३, भे १ त ५९२६, भे १ त ६९६४, भे १ त ४२४६,भे १ त ७१४९,भे।१त ५२६२ र एउटामा नम्बर नभएको ९ वटा ट्याक्टर नियन्त्रणमा लिइएको प्रहरीले जनाएको छ । नियन्त्रणमा लिएका व्यक्तिहरुलाई अभद्र व्यवहार कसुरमा कारबाही अघि बढाएको छ भने ट्रयाक्टर र नदीजन्य पदार्थसहित कारबाहीका लागि जिल्ला समन्वय समितिमा बुझाइएको जिल्ला प्रहरी कार्यालय बाँकेले जनाएको छ ।

खासगरी इलाका प्रहरी कार्यालय कोहलपुर र कम्दी मातहत पर्ने क्षेत्रमा प्रहरीकै संरक्षण र मिलेमतोमा अवैधरुपमा खोलानाला तथा नदी दोहन तीव्ररुपमा हुँदै आएको थियो ।

राप्तीसोनारी गाउँपालिकाको वडा नं। २ मा पर्ने खैरी, परुवा, झिझरी र मुगुवा खोला, वडा नं ६ को ढलैया, जललाघाट, वडा नं ५ को आलिनगर, वडा नंं ८ को सम्शेरगन्ज तथा डुडुवा गाउँपालिका–५ को कम्दीस्थित राप्ती नदीको खजुरिया, बैजनाथ गाउँपालिकाको मानखोला क्षेत्रबाट नदीजन्य पदार्थको अवैध दोहन भइरहेको छ । केही क्षेत्रमा रातभर उत्खनन्को काम हुन्छ भने केही स्थानहरुमा दिनभर पनि निर्वाधरुपमा उत्खनन्को काम चलिरहेको छ ।