सुर्खेत, कर्णाली प्रदेशका थप १६ जनामा आज (सोमबार) कोरोना संक्रमण पुुष्टि भएको छ। यो सहित कर्णाली प्रदेशमा संक्रमितको कुल संख्या ६५७ पुगेको छ। प्रदेश अस्पताल, सुर्खेत र पशुपन्छी रोग अन्वेषण प्रयोगशाला सुर्खेतमा गरिएको पीसीआर परीक्षणमा दैलेखका १०, सल्यानका ५ र सुर्खेतका एकजनामा कोरोना संक्रमण पुष्टि भएको कर्णाली प्रदेशको सामाजिक विकास मन्त्रालयले जनाएको छ।

दैलेखमा संक्रमण पुष्टि हुनेमा आठबिस नगरपालिका, नारायण नगरपालिका, डुंगेश्वर गाउँपालिका, नौमुले गाउँपालिका र गुराँस गाउँपालिकाका १५ देखि ४० वर्ष उमेरका पुरुष छन्। त्यस्तै सल्यानको कुमाख गाउँपालिका र वनगाढ कुपिण्डे नगरपालिकाका १८ वर्षकी एक महिलासहित १७ देखि २३ वर्ष उमेरका ४ पुरुष छन्।

त्यस्तै सुर्खेतको बराहताल गाउँ पालिकाका १ पुरुषमा कोरोना संक्रमण पुष्टि भएको छ। थपिएकासँगै काेराेना संक्रमितकाे संख्या दैलेखमा कूल ३६७, सल्यानमा १२४ र सुर्खेतमा ९२ जना पुगेको छ। मन्त्रालयका अनुसार कालीकोटमा २८, जुम्ला २२, जाजरकोट पाँच, मुगुमा दुई, हुम्ला र डोल्पामा एक/एक संक्रमित देखिएका छन्।

मन्त्रालयका स्वास्थ्य सेवा महाशाखा प्रमुख डा. लक्ष्मीनारायण तिवारीका अनुसार सङ्क्रमितहरु सवै स्वास्थ्यकर्मीहरुको सम्पर्कमा रहेका छन्। अहिलेसम्म रुकुमपश्चिममा मात्र सङ्क्रमण देखिएको छैन। कोरोनाबाट कर्णालीमा तीन जनाको मृत्यु भएको छ भने सात जना उपचारपछि घर फर्किएका छन्।