बिरेन्द्रनगर,  सुर्खेत कर्णाली प्रदेश सरकारले कोरोना संक्रमण अन्त्य नहुँदासम्म सेना परिचालन गर्न पाउने अधिकार माग गरेको छ। कोरोनाको संक्रमण फैलिँदै गएपछि संक्रमितको उद्धार, क्वारेन्टिनको सुरक्षा तथा व्यवस्थापन र अन्य प्रतिकार्यमा सेना परिचालन गर्ने अधिकार माग गरेको कर्णाली प्रदेश सरकारकी प्रवक्ता विमला केसीले जानकारी दिइन् ।

सोमबार बसेको मन्त्रिपरिषदका निर्णयहरु आज सार्वजनिक गर्दै मन्त्री केसीले कोरोना अन्त्य नहुँदासम्म प्रदेशलाई सेना परिचालनको अधिकार दिन संघीय सरकारसँग स्वीकृति माग गरेको बताइन् ।

‘प्रदेशमा संक्रमित बढ्दै गएका छन्, गाउँका क्वारेन्टिनमा सुरक्षा दिन सकिएको छैन,’ भूमि व्यवस्था कृषि तथा सहकारी मन्त्रीसमेत रहेकी मन्त्री केसीले भनिन्, ‘नेपाल प्रहरी र सशस्त्र प्रहरी बलले मात्रै सुरक्षा र प्रतिकार्य सम्भव नभएपछि आवश्यक परेको खण्डमा सेना परिचालन गर्न दिन केन्द्र सरकारसँग स्वीकृति माग गरेका छौँ ।’

प्रदेशमा नेपाल प्रहरी र सशस्त्र प्रहरी बलको जनशक्ति कम भएकै कारण गाउँका क्वारेन्टिनमा सुरक्षा दिन नसकेको उनको भनाइ छ।

‘डोल्पा, हुम्ला र मुगुका दुर्गम गाउँबाट पनि कोरोना संक्रमितको उद्धार गर्नुपर्ने अवस्था आउन सक्छ। अधिकार पाएको खण्डमा संक्रमितको उद्धारका लागि नेपाली सेनालाई खटाउन सकिन्छ,’ उनले भनिन्, ‘सेनासँग भएको स्रोतसाधान र जनशक्तिलाई प्रयोग गर्न सकियो भने कर्णालीलाई कोरोना महामारीसँग लड्न सहज हुनेछ ।’

कोरोनाका कारण रोजगारी गुमेपछि औसतमा दैनिक ४ हजार कर्णालीवासी भारतबाट फर्किने गरेका छन् । हाल कर्णालीका ८० हजार नागरिक भारतमा रहेको र ३० हजार फर्किने प्रदेश सरकारको अनुमान छ ।ठूलो सङ्ख्यामा नागरिक भित्रिएकोले महामारी फैलिने त्रास बढेको छ । हालसम्म कर्णालीमा भारतबाट आएका ३८ जनामा कोरोना पुष्टि भइसकेको छ ।