काठमाडौं, प्रधानमन्त्री केपी शर्मा ओलीले आज संसदमा सरकारको नीति तथा कार्यक्रममाथि उठेका प्रश्नहरुका जवाफ दिने भएका छन् ।

आज (मंगलबार) मध्याह्न १२ बजे संसद वैठक बस्दैछ । राष्ट्रपति विद्यादेवी भण्डारीले जेठ २ गते संघीय संसदको दुवै सदनको संयुक्त बैठकमा सरकारको नीति तथा कार्यक्रम प्रस्तुत गरेकी थिइन् । आर्थिक वर्ष २०७७–७८ को नीति तथा कार्यक्रममा आइतबार र सोमबार दुई दिनसम्म छलफल भइसकेको छ ।

बिभिन्न राजनीतिक दलका तर्फबाट नीति तथा कार्यक्रममा सात वटा संशोधन प्रस्ताव समेत परेको छ । प्रधानमन्त्री ओलीले नीति तथा कार्यक्रममा सांसदहरुले उठाएका प्रश्नहरुको जवाफ दिइसकेपछि संशोधन प्रस्तावहरुलाई निर्णयार्थ प्रस्तुत गर्ने कार्यसूची संसद सचिवालयले तयार पारेको छ ।

त्यसपछि नीति तथा कार्यक्रम पारित गर्ने कार्यसूची छ । सांसदहरुले सरकारको नीति तथा कार्यक्रमले नागरिकको तत्कालका समस्या सम्वोधन गर्न नसकेको, बजेट छरिएर आएको र भोलिको सपना देखाएर आजका समस्याबाट तर्किएकोलगायतका आरोप लगाएका छन् ।