काठमाण्डौ, नेपाली भूमि मिचेर भारतले सडक निर्माण गरेको स्थाल दार्चुलाको छाङग्रुमा आफ्नो उपस्थिति जनाउन नेपाल सरकारले सशस्त्र प्रहरीको एउटा टोली घटनास्थलमा पठाउने भएको छ । शसस्त्र प्रहरीका इन्स्पेक्टर लिलिबहादुर चन्दको कमाण्डमा भोलि बुधवार २५ जनाको सानो टुकडी छाङग्रु पठाइने गृहमन्त्रालय स्रोतले जानकारी दिएको छ । सो टोली शुक्रबारसम्ममा भित्र छाङग्रु पुग्नेछ ।

दार्चुलाको सिमापारि भारतीय क्षेत्रमा भने करिब ३५ सय आधुनिक हतियार धारी भारतीय सुरक्षाकर्मी तैनाथ रहेको बताइएको छ । स्थलसेनाको दुई कम्पनी, आइटिबिपी (इण्डियन टिबेट बोर्डर पुलिस ) को चार कम्पनी र सिमा सुरक्षा बल (एसएसबी) को दुई बटालियनमा आवद्ध सैनिकहरुलाई अत्याधुनिक हतियार सहित तैनाथ गरिएकोले त्यसको काउण्टरको लागि सामान्य हतियार सहित केवल २५ जनाको टुकडी पठाइनुले नेपालको सिमा सुरक्षाको अवस्था के छ भन्ने स्पष्ट हुन्छ ।

तर, गृहमन्त्रालयका अधिकारीहरु भने भारतसंग लड्न नभै नेपाली सिमाको रक्षा गर्नको लागि नेपाली सुरक्षाकर्मी सिमा क्षेत्रमा जान लागेकोले भारतसंग तुलना नगर्न अनुरोध गर्छन् । ‘अहिलेको सिमा विवादमा हामीले लडेर भन्दा कुटनीतिक पाराले समाधान गर्ने विषय हो । त्यसैले पारि कति सैनिक तैनाथ छन् र हामीसंग कति छन् भनेर तुलना गर्ने कुरै होइन, हाम्रो सिमा सुरक्षामा सरकार संवेदनशिल छ भन्ने कुरा पुष्टि गर्नको लागि यो टोली जान लागेको हो’ गृहमन्त्रालयका एक अधिकारीले जनतापाटीसंग भने । उनले आवश्यकताअनुसार सरकारले सिमा क्षेत्रमा सुरक्षाकर्मीको उपस्थिति बढाउंदै लैजाने बताए । उनकाअनुसार त्यो क्षेत्रमा प्रहरीको टुकडी होइन सयौंको संख्यामा सुरक्षाकर्मीको गुल्म नै राख्ने आन्तरिक तयारी भैरहेको छ ।

नेपाली सेनाको एमआई १७ हेलिकोप्टरमार्फत भोलि बुधबार जान दार्चुला जान लागेको सशस्त्र प्रहरीको सो टोलीले आफ्नो साथमा कम्तिमा ६ महिनाको राशन, हतियार, गोलीगठ्ठा, सञ्चार सेट, जाडो तथा गर्मी यामको लागि आवश्यक पर्ने कपडाहरु, औषधी पनि साथमै लैजाने भएको छ । हाल दार्चुलाको शसस्त्र प्रहरी गुल्ममै रहेका इस्पेक्टर लिलिबहादुर चन्द भने उतैबाट टोलीमा मिसिने बताइएको छ ।

दार्चुला सदरमुकाम खलंगाबाट १ सय ३ किलोमीटर टाढा छाङग्रु पर्छ । छाङग्रुमै नेपाल प्रहरीको एउटा टुकडी पनि रहेको छ । सरकारले छाङग्रुमा सुरक्षाकर्मीको लागि अत्याधुनिक हिटिङ्ग सिस्टमसहितको भवन बनाउने निर्णय यस अघि नै गरिसकेको छ । त्यसको लागि ९ करोड रुपैंया विनियोजन गरि निर्माण कार्य अगाडि बढाउने तयारी गर्रिको छ । सो भवन बनेपछि कम्तिमा १ सय ५० जना सुरक्षाकर्मीले पुस माघमा समेत निर्धक्कसंग बस्न सक्ने बताइएको छ ।