अछाम, अछामको पञ्देवल विनायक नगरपालिकाका नगरप्रमुख देवराज देवकोटाले हाजिर हुन नदिएका कर्मचारी कार्यकारी अधिकृत पदम बहादुर माझीलाई तोकिएको कार्य सम्पादन गर्न उच्चअदालत दिपायल डोटीले आदेश दिएको छ ।

गत भाद्र ३१ गते नगरपालिकाका अधिकृत पदमबहादुर माझीले दायर गरेको रिट निवेदनमाथि मंसिर  २९ गते फैसला सुनाउँदै उच्चअदालत दिपायल डोटीले विपक्षीको नाममा हाजिर हुन र अख्तियार प्राप्त निकायबाट तोकिएको कार्य सम्पादन गर्न बाधा, अडचन नगर्नु नगराउनु भनि उत्प्रेषण आदेश जारी गरेको हो ।

संघीय मामिला तथा सामान्य प्रशासन मन्त्रालय सिंहदरबार काठमाडौंले मंगलसैन नगरपालिकाबाट समायोजन संशोधन सहित प्रमुख प्रशासकीय अधिकृतको जिम्मेवारी दिई पञ्चदेवल विनायक नगरपालिकामा हाजिर हुन खटाएको थियो ।

तर, पञ्चदेवल विनायक नगरपालिकाका प्रमुख देवराज देवकोटा र तत्कालीन नि प्रमुख प्रशासकीय अधिकृत लक्ष्मीकान्त बजगाइले हाजिर हुन नदिई पदीय कर्तव्य पालना गर्न पदमबहादुर माझीलाई बाधा अवरोध गरेका थिए ।

अधिकृत माझिले नगर प्रमुख देवकोटा, तत्कालीन कावा नगर प्रमुख पदमबहादुर धामी, लक्ष्मीकान्त बजगाई र जिल्ला प्रशासन कार्यालय अछाम समेत विपक्षी रहेको उक्त उत्प्रेषण मुद्दाको अदालतले अन्तिम किनारा लगाइदै फैसला सुनाएको हो ।

 माझीकाे दुखेशाे

म स्थानीय तहको लामो समयको अनुभव प्राप्त कर्मचारी हुँ । हालसम्म कुनै पनि पार्टीमा आबद्ध छैन । पार्टीमा आबद्ध नहुने कर्मचारी सायद यसरी नै पूर्वाग्रहबाट दुख पाउँदा रहेछन भन्ने अनुभूति त्यतिबेला भयो जब मलाई पार्टी सदस्यता लिन दबाब सिर्जना भयो ।

जिल्लाको नीति निर्माण योजना तर्जुमा देखि कार्यालय प्रमुख राजनीति दलका नेताहरुलाई जनसरोकारका विषयमा तालिम दिने स्रोत व्यक्ति समेत हु । तर मेरो आफ्नै घर भएको नगरपालिकाका म जस्तो अनुभवी कर्मचारीलाई हाजिर हुन बाधा अवरोध हुँदा म अचम्मित परेको थिएँ । यतिबेला सम्मानित अदालतकाे आदेशले खुशि तुल्याएकाे छ । 

यस्तो छ नगरप्रमुखको भनाई

अछामको पञ्देवल विनायक नगरपालिकाका नगरप्रमुख देवराज देवकोटाले आफनो नगरपालिकालाई दक्ष जनशक्तिको आबश्यक्ता महशुस गरेर त्यस्तो कदम चालेको बताएका छन । देबकोटाले सम्मानीत अदालतको आदेशलाई सहज रुपमा लिएको बताए ।

उनले कानुन भन्दा माथी कोही नभएको भन्दै अदालतको आदेशलाई सहज रुपमा लिएको बताएका हुन । उनले अब कार्य सम्पादनमा कुनै अबरोध नहुने समेत जिकिर गरे ।