सछुवान (चीन), १४ पुस, चीनको नान्छोङ शहरस्थित चाइना वेष्ट नर्मल युनिभरसिटीमा नेपाली विद्यार्थीहरुले प्रस्तुत गरेको सांस्कृतिक कार्यक्रममा चिनिया तथा विदेशी विद्यार्थीहरुले उत्साहपूर्ण सहभागिता जनाएका छन् । नव वर्ष सन् २०१८ को स्वागतार्थ आयोजना गरिएको सांस्कृतिक कार्यक्रममा सो विश्वविद्यालयमा अध्ययनरत नेपाली विद्यार्थीहरुले नेपाली लोकगीत तथा लोकनृत्यसहित विविध सांस्कृतिक कार्यक्रममा सहभागिता जनाएका हुन् ।

सो अवसरमा प्रस्तुत गरिएको ‘म हुँ नेपाली बाबु मेड इन नेपाल’ बोलको गीतमा नृत्य प्रस्तुत गर्न दौरा, सुरुवाल, भादगाउँले टोपी र स्टकोटमा सजिएका हुम्ली विद्यार्थी धनन्जय बुढा स्टेजमा आउँदा दर्शकहरुले जोडदार ताली बजाएका थिए । नृत्य प्रस्तुत गर्दा विश्व विद्यालयका नेतागण, शिक्षक तथा विद्यार्थीहरु रौसिदै वाह वाह भन्दै प्रशंसा गरे । त्यतिमात्र नभएर नृत्यको अन्त्यमा चन्द्र सूर्य अंकित नेपाली राष्ट्रिय झण्डा फहराउँदा दर्शकहरुले सम्मान व्यक्त गरे ।

नेपाली विद्यार्थी निर्मला तिम्सिनाले प्रस्तुत गरेको ‘यो हो मेरो प्राण भन्दा प्यारो माईती घर’ बोलको गीतको नृत्यमा पनि चिनिया तथा अन्य विदेशी विद्यार्थीहरु हौसिएका थिए । प्रशन्न ढुंगेल र सुवास विश्वकर्माले गाएको र्याप गीतमा विदेशी विद्यार्थीहरु नृत्य गर्न स्टेजमै पुगेका थिए । सांस्कृतिक कार्यक्रममा अफ्रिकी तथा लाओसी विद्यार्थीहरुले विभिन्न गीत तथा नृत्यहरु प्रस्तुत गरेका थिए । कार्यक्रमको शुभारम्भमा नेपाली विद्यार्थी कुबेर नेपालले चिनिया भाषामा नव वर्ष सन् २०१८ को शुभकामना व्यक्त गर्दै सम्पूर्ण विद्यार्थी तथा शिक्षकहरुमा सुख, शान्ति, सुस्वास्थ्य र शैक्षिक सफलताको कामना गरेका थिए ।

सो कार्यक्रममा चाईना वेष्ट नर्मल युनिभरसिटीका डिन स लिउसानका साथै शिक्षकहरु छिउ स्या, चाङ पिङ पिङ, यि स्याओ मिन, हान च्या सिउ, छाई चि लिन, थाङ यु होङको सहभागिता रहेको थियो । चीनको सछुवान प्रान्तको नान्छोङ शहरमा सन् १९४६ मा स्थापना भएको सो विश्व विद्यालय पश्चिम चीनकै सबैभन्दा ठूलो र लोकप्रिय विश्व विद्यालय मध्येको एक मानिन्छ ।