मंगलसेन, नेत्र विक्रम चन्द विप्लव नेतृत्वको नेपाल कम्युनिस्ट पार्टीले समानान्तर सत्ताको रुपमा गठन गरेको जिल्ला जनपरिषद अछामले जिल्लाको ढकारी गाउँपालिका– २ निवासी राजबहादुर शाही र भक्तबहादुर शाहीलाई पत्र काटेको छ ।जिल्ला जनपरिषद् प्रमुख निरक शाहीद्धारा हस्ताक्षर गरिएको पत्रमा दुबै जनालाई १५ दिनभित्र जिल्ला जनपरिषद् कार्यालयमा उपस्थित हुन भनिएको छ ।

गयको तिजको दिन सोही ठाउँ निवासी लोकेन्द्रबहादुर शाहीको मृत्युलाई लिएर निर्दोष व्यक्तिलाई राजनीतिक पूर्वाग्रहका आधारमा फसाउने उद्देश्यले आरोप लगाएर किटानी दिएको जनपरिषद अछामले बताएको छ । झुट्टा मुद्दा लगाएर दुबै जनाले स्थानीय कबिन्द्र शाही, तपेन्द्र शाही र राजेश शाहीलाई फसाउने षड्यन्त्र गरेको पत्रमा उल्लेख छ ।

“साउन १६ गते ढकारी गाउँपालिका–२ सावमा तीजको दिन लोकेन्द्रबहादुर शाहीको दुःखद् निधन भएको विषयलाई लिएर सोही ठाउँ बस्ने चक्रबहादुर शाहीको नाती, मानबहादुर शाहीको छोरा राजबहादुर शाही र सोही ठाउँ बस्ने रामबहादुर शाहीको नाती पदम शाहीको छोरा भक्तबहादुर शाहीले मृत्युको खास कारण पत्ता नलगाई र सत्यतथ्य छानविन नगरी राजनीतिक पूर्वाग्रहीका साथ षड्यन्त्रपूर्ण ढंगले निर्दोष व्यक्ति कबिन्द्र शाही, तपेन्द्र शाही र राजेश शाहीलाई फसाउने उद्देश्यका साथ झुटा मुद्दा लगाएको भन्ने निज व्यक्तिहरुले भदौ २५ गते जिल्ला जन परिषद्ममा दिएको उजुरीका आधारमा घटनाको निष्पक्ष छानविन गर्नुपर्ने हुँदा तपाई राजबहादुर शाही र भक्तबहादुर शाहीलाई पत्र प्राप्त भएको १५ दिनभित्र जिल्ला जन परिषद् अछामको कार्यालयमा अनिवार्य उपस्थितिको लागि यो पत्रमार्फत जानकारी गराइन्छ” पत्रमा उल्लेख छ ।

जनपरिषदले १५ दिनभित्र उपस्थित नभए जनअदालतमार्फत आवश्यक कारवाही अगाडि बढाउने चेतावनी समेत दिएको छ ।

यसअघि उक्त घटनामा निर्दोष व्यक्तिलाई फसाउने षड्यन्त्र भएको भन्दै जन परिषद र नेकपा अछामले विज्ञप्ति जारी गरेर विरोध जनाएका थिए ।

यस्तो छ जन परिषदको पत्र